موقع اخبار كورة - كشف محمد ربيعة، مدافع نادي سموحة السكندري، عن كواليس عروض الأهلي والزمالك لضمه في وقت سابق، مؤكدًا أن الحديث لم يتجاوز مرحلة المفاوضات الشفوية مع وكيله، دون تقديم عروض رسمية للنادي.

وقال ربيعة في تصريحاته لقناة "أون تايم سبورت": "كان في كلام من الأهلي والزمالك، لكن كله كان مع الوكيل، وما جاش أي عرض رسمي للنادي، وكل اللي اتقال سمعته من وكيلي، لكن مفيش حاجة وصلت للنادي بشكل رسمي أو جدي".

وفيما يخص تمثيل المنتخب الوطني من خارج الأهلي والزمالك، قال ربيعة: "أنا وصلت للمنتخب وأنا بلعب مع الاتحاد، يعني الموضوع مش مقتصر على الأهلي والزمالك، لكن طبعًا اللعب في نادي كبير بيساعد وبيفتح فرص أكبر".

وأضاف: "الأهلي والزمالك بوابة لأي لاعب، سواء للمنتخب أو لعروض احتراف، لكن مش معناها إنك لو مش فيهم مش هتوصل".

وعن رأيه في مستوى الأهلي، أكد ربيعة أن الفريق الأحمر ظهر بشكل مميز هذا الموسم، قائلاً: "السنة دي الأهلي في حتة تانية، الصفقات قوية وكل التدعيمات فرقت معاهم، بس الدوري مش مضمون، في فرق كتير بتلعب كورة كويسة زي بيراميدز وسيراميكا".

أقوى مواجهات الموسم.. ومهاجم واحد أرهقه

وحول أصعب المباريات التي خاضها، قال ربيعة: "الأهلي كان أصعب ماتش لعبناه، رغم إن سكواد بيراميدز أقوى، لكن ماتش الأهلي كان فيه ضغط أكبر".

أما عن المهاجم الأكثر إزعاجًا له خلال الموسم، فأجاب: "وسام أبو علي هو اللي حسيت إنه تعبني شوية. لاعب قوي ومميز، وكنت مستني ألعب قدام الأهلي علشان أواجه مهاجم بحجمه، وحسيت بنفسي في التحدي ده، وقال لي بعد الماتش بطريقته المعروفة: لعيب كبير، وكانت لفتة لطيفة منه".

أفضل لاعب في الدوري؟ إمام عاشور بلا منازع

وعن أفضل لاعب في الدوري المصري، قال ربيعة: "إمام عاشور هو أفضل لاعب في مصر الفترة الأخيرة، لاعب مختلف وبيفرق جدًا في الملعب".

وأوضح أن الفرق الكبرى رغم امتلاكها أسماء لامعة، تتعرض أحيانًا للتعطيل من فرق صغيرة بسبب ظروف المباريات، وقال: "الدوري الموسم اللي فات كان استثنائي، في ماتشات كنا فاكرين هنخسرها وكسبناها، والعكس، وكل ده توفيق من ربنا".

الانضمام للمنتخب.. ونقطة تحول

واختتم ربيعة حديثه بالتأكيد على أن انضمامه للمنتخب الوطني كان لحظة فارقة في مسيرته: "ربنا كرمني وكان توقيت عظيم، جات الدعوة قبل فرحي بيومين، وكانت فرحة مضاعفة، وجودي مع المنتخب غير تفكيري وخلاني أحلم أكتر".

وأكد أن مثله الأعلى محليًا هو محمد عبد المنعم، بينما عالميًا يعجب بأسلوب المدافع سيرجيو راموس، وقال: "بحب المدافع اللي بيعرف يلعب كورة أكتر من اللي بيعتمد على القوة بس".