علاء ميهوب لـ إمام عاشور: اوعى شيطانك يلعب في دماغك وتقول أنا هكبر شوية على الأهلي

موقع اخبار كورة - وجه علاء ميهوب نجم النادي الأهلي الأسبق، انتقادات لاذعة لـ إمام عاشور لاعب الفريق الأحمر، بعد تخلفه عن السفر مع الفريق إلى تنزانيا لخوض مباراة يانج أفريكانز التنزاني، ضمن منافسات بطولة دوري أبطال أفريقيا.

وقال علاء ميهوب في تصريحات لـ قناة "أون سبوت 1": "لازم يا إمام تعرف أنت فين بالضبط، أنت في النادي الأهلي أكبر نادي في أفريقيا والشرق الأوسط وأي حد يتمنى يمشي جنب النادي الأهلي مش ينتمي له".

وأضاف: "أنت في الأهلي من 3 سنين، وكنت قبل كدة في الزمالك نادي كبير وله تقاليده ونفس الكلام اللي بقوله على الأهلي هقوله على الزمالك لأن الزمالك نادي كبير وله بطولاته وشعبيته الكبيرة، ولما جيت الأهلي بتقول معملتش حاجة ولكن عملت مشاكل كتير وفي فلوس اتخصمت منك في السنين اللي فاتت".

وأكمل: "لازم تعرف إن الأهلي كبير بجماهيره وإدراته وبطولات وباللاعيبة العظيمة اللي لعبت له على مدار التاريخ وفي ناس مقدرش أقارنها بيك لأنهم في حتة بعيدة جدا مشيوا والأهلي مستمر ببطولاته وجماهير، ومش بيوقف على حد".

وأردف: "لو مش عارف قيمة الأهلي وجماهيره أنا هقولك تعرفها إزاي، لازم تعرف احترامك للنادي ولجماهيره مهما كنت عظيم في الكورة لكن الـ3 سنين في الأهلي حاجة وعمرك في الكرة كله حاجة تانية".

وواصل ميهوب رسالته لـ إمام قائلا: "في الأهلي خدت نجومية وتسلطت عليك أضواء كثيرة واستفدت ماديا بشكل أكبر، لكن اوعى شيطانك يلعب في دماغك وتقول أنا هكبر شوية على الأهلي.. أقسم بالله ولا تفرق مع الأهلي ولا جماهيره".

وأتم: "اوعى تعمل حركة تاني تسيء للأهلي وجماهيره، الجماهير اللي مطلعاك سابع سما دي ممكن تخسف بيك الأرض، ويارب تتعلم من الحركة دي".